|
Liedtexte
Tohuus
Wenn de Harwststoorm huult, dat Meer upwöhlt
de Winterwind mien Fewer köhlt,
dat Reet an´n Strand stief warrn lett,
sien ruuge Küll den utspeet hett.
Wenn Novembermööv na Rägen schreet,
un de melksunn swemmt in´t daakig Kleed,
dat de langen schreegen Wulken deelt,
in´n Newel Welt verstäken speelt.
Wenn de Hahn al fröh den Dag inkreiht,
Fisch - un Tangröök solten weiht,
un Water pingelt an de Steen´,
Sommerfloot köhlt Vagelbeen.
Wenn´t Suugen sappt vun Sand un Slick,
Sommernachtsporgen drall un dick
de Morgensunn utquarkt, de grient,
un himbeerrot dör´t Finster schient.
Wenn Gummelschuur den Roggen walkt,
lüttje Lüntjes sik in Pütten balgt,
un griese Reegers Siet an Siet
seilt vergeeten vun de Tiet.
Wenn Kreihen kreiht un Schaapen blöökt,
Nachtbottervagels Slaapbööm söökt,
de Abendsunn in´n Stroom verblött,
un Maandlichtnacht di bäden lett.
Wenn de Mohn sien rode Druppen street,
steiht öwern Stroom een Licht, ik weet,
dat bold de wille Wind ganz gau
upspringt un bringt dat nee´e Blau.
Land, ut dat ik baren bün,
neger, wieter,´k will de finn´.
Eenmal kumm ik in di to Roh,
bün woller Du, un froh, so froh -
un denn,
denn bün ik Tohuus.
Text: Helmut Debus
Musik auf CD "Wille Harten" (1991)
Stadt an´n Stroom
´n dralle Koh un lüttje Lammerwulken
drömelt in de Middagssunn
´n Jiepelfleut vun´n Wichelboom
hier hebb ick mien´Leeder funn´
koole Melk, dat witte Peerd,
´n Stimm de sik in´n Wind verleert,
Chesterfield,Cola-duun,
n´"Madman" trummelt Läwenswuut so as
Keith Moon
Refr.: Stadt an´n Stroom, achtern Maand,
´k höör den Klang de in di wahnt.
Roop ik di,roppst du mi?
noch warm ik mi an di.
Werserwelln sünd füünsch an´t belln
Lüüd bölken owern Tuun
De Stutenfroo ruukt honnigsööt
de wille Fleeder bleuht sik duun
´n stinkig Butt, een Boot,
neeschierige Oogen gluupt up de Straat,
´n dördreiht Schree, ganz lies,
treckt vörbi as braken Ies.
Spöökgeschichten in Muttenspeckgesichter
fangt bi Adolf un Eva an
de Oolen in Sweet, de Jungen freert
Sprietnacht, wo numms aten kann
Schützenrock, köömgröön,
Schietendickgesichter so gräsig tofreen.
Hirschbock roort, Heil un Sieg,
bruune Rieder drievt Minschen owern Diek.
Ankerplatz in een Meer vun Versehn
Nattnäsen quesen sik mö.
Füürwerkmusik fröh morgens in´n Gaarn
piert luut as´n Stoormbö
Wörpels rullt in´n Sand
Waterstadt geevt mi dien Hand.
Narwenland, natte Placken,
morgen höör ik jo vun Freeheit snacken.
Text: Helmut Debus
Musik auf CD "Vullmaand & Morgenfloot" (1999)
Schöner as de Maand
Ik lääs den Breef vun di du büst gahn
kann nix mehr denken nich reden nix dahn
mien Sommer mien Füür mien Root
mien Lewen mien Beven mien Bloot
Ik will allns achter mi laten
Ik höör de Nachtpeer an´t Enn vun de Straaten
Se bringt di´n Grashalm draag em as Ring
bringt di dat Leed dat ik noch sing
Bring mi dat Licht in de Nacht de hier wahnt
Schöner as de Maand
Du büst schöner as de Maand
Hart full Afscheed un Jagen
ganz scheef vun Jammer un Klagen
Ik kiek in´n Spegel wo dien Schadden danzt
Ik maal di Bloomen de du ruuken kannst
Ik seil mien Boot dat Meer is so groot
un mien Land puckert wild in mien Bloot
wenn nix mehr in mi löögt
wenn truur mi nich mehr böögt
will ik di leven
Ik vergeet di, vergeet mi nich
Vergeet mi, ik vergeet di nich
Text: Helmut Debus
Musik auf CD "Twuschen Ankamen un Afscheed" (2000)
|